اقتني ما يمكنك الاعتناء به

بسم الله والصلاة والسلام على رسول الله
كثرت الديكورات والنقوش والتحف ومستلزمات المطبخ وامور كثيرة يمكن اقتناءها بالمنزل
وقد نشتري ويزدحم البيت بالتحف والفازات والتي بدورها تحتاج لعنايه
بعض البيوت بها خدم والبعض ربة البيت تقوم بكل شيئ وهذه الامور تمثل عبئ عليها من تنظيف وتلميع حتى الملابس عندما تكثر وتزيد عن الحاجة تصبح كذلك
لذا قبل الشراء علينا ان نقدر احتياجنا وضرورة الشيئ اولا وهل يسهل الاعتناء به ام انه سيمثل عبئا اكثر من فائدته بالنسبة لنا
دمتم في حفظ الله

ترتيب الاولويات

بسم الله
والصلاة والسلام على رسول الله
لكل بيت ظروف ونظام حياة بيختلف عن التاني
عشان كده ممكن تلاقي جداول شغل البيت منتشرة على النت وتجربي ومش نافع خاصتا لو معاكي اطفال كل واحد ليه نظامه المناسب مع ظروفه
ومن الافضل انك كل صباح او من بالليل قبل ما تنامي تفكري ايه اللي محتاج يتعمل وايه اهم من ايه واول حاجة هتبدءي بيها قيمي يومك والمطلوب منك ووازني بين اعمالك
ويكون مقياسك في ده اكتر حاجة مضايقاكي وهتفرحي لما تنجزيها او حاجة زوجك موصيكي عليها او حد من اولادك الحاجة المهة اللي هتعمل فرق وهتريحك وتريح اللي حواليكي دي اللي تبدءي بيها
والحاجة اللي مش فارقة خليها في الاخر
يعني مثلا ممكن الدولاب محتاج ترتيب والريسيبشن محتاج تنضيف ومسح اخلي الدولاب للاخر وابدء بالمهم
بس في حاجات بسيطة ممكن تكون ثابتة الصبح زي فرش السراير وفتح الشبابيك للتهوية حتى لو مش هتبدءي بغرف النوم خلي ده ثابت معاكي هتحسي بفرق في نشاطك كتير
ودايما قبل كل شيء الاستعانة بالله والتوكل عليه سبحانه
بنحتاج لمساعدة ربنا في كل وقت من غير معونته وتيسيره ابسط الامور ممكن تلاقيها بقت صعبة
وانت بتصلي اقري سورة الفاتحة بتدبر واستشعري طلب المعونة في " اياك نعبد واياك نستعين " ❤

الجود من الموجود

الكرم خلق جميل من الاخلاق الحسنة التي يحث عليها ديننا الحنيف و كلنا بنحب الاشخاص الكرماء و نحبايضا ان نتخلق بالكرم

ومن اكتر اوقات يمكن الانسان بيكرم فيها لما بيكون عنده ضيف

تحبي ترحبي بيه و تحسسيه انك سعيدة بزيارته

لكن ساعات و لأي ظرف يتصل بيكي قريب لزيارتك و انت غير مستعدة

بالنسبة لي كان يربكني هذا الامر قليلا و اشعر بحيرة

و لكن بعد ما سمعت هذه المقولة اصبحت مرتاحة

و هي ان الجود من الموحود

اجتهدي في اكرام ضيفك بالمتاح عندك و ابتغي وجه الله في اكرامه
فعندما تقدمي ما لديك و ما هو متاح فانت لم تبخلي بشئ
 و لي قصة مع هذا المثل و هي أن
جاء اخي لزيارتي في مرة و تغدينا و بعد الغداء جهزت طبق فاكهة و كان لدي صنفين فاكهة بكمية وفيرة و هناك ايضا اخر حبتين كمثرى فاحترت هل اضع حبتا الكمثرى في الصحن ام انه عيب و ما يصحش اني اضع حبتين فقط !
فتذكرت المثل ووضعتهما و قلت لا تفكري كثيرا فالجود من الموجود و اذ بأخي لم يأكل سوى الكمثرى !! فسعدت كثيرا و قلت في نفسي فعلا وضعها جود و لو كانت قليلة
لا تستصغري شئ و اكرمي بما هو متاح عندك و ابتغي وجه الله
و تذكري دائما قول الحبيب الصطفى عليه افضل الصلاة و السلام
 " لا تحقرن من المعروف شيئا ولو أن تلقى أخاك بوجه طلق "

أجمل ما قاله زوج في حب زوجته

 " إني رزقت حبها "

اجمل ما قيل في مشاعر الحب الصادق
هكذا قال النبي صلى الله عليه و سلم عن حب زوجته خديجة رضي الله عنها و ارضاها

اللهم صلي على حبيبنا و معلمنا محمد صلى الله عليه و سلم

الرجيم و الجيم

السلام عليكم
يمكن ده مش موضوع قد ما هو خاطرة
في يوم و انا في النادي كنت مارة قدام صالة الجيم
شباب و بنات اوزانهم تعتبر كبيرة بيلعبوا على الاجهزة الرياضية
سألت نفسي سؤال ليه المجهود اللي بيعملوه ده ما يروحش في عمل خير
يعني البنت لو ساعدت والدتها و اتحركت في البيت او راحت اشترت طلبات و اتمشت و بذلت مجهود
و الشاب لو شال عن اهله شوية و ساعدهم في الذهاب لدفع الفواتير او شراء متطلبات و بذل مجهود مش برده هايخس
او اتطوع في جمعية خيرية و راح في قوافل خير من اللي بتوصل طعام للفقراء او بتمد وصلات مياه
كل الحاجات دي محتاجة حركة و نشاط ، الناس زمان ما كانوش يعرفوا الجيم و كانت حياتهم كلها نشاط وصحتهم احسن مننا
وهل احنا مجهوداتنا بأينا دايما عاوزينها لينا ؟!
بمعنى هل ممكن نستحمل تعب الرياضة في الجيم مجرد احساسنا اننا بننفع نفسنا و ما نستحملش التعب في خدمة بنسديها لقريب ؟!
مع ان لو نبص كده هانلاقيها برده عايدة علينا بالخير لأن كل معروف صدقة و تزكيه للنفس و بيعودعليها بالخير
ممكن ندور على خدمة نسديها لشخص يكون مجهودها مقارب لمجهود الجيم ونخليها نظام ثابت اونعمل نظام لتنظيف البيت بمعنى انه يكون متتالي و يتطلب عرق و مجهود
خلي نصيب من صحتك و مجهودك للي حواليك و هاتلاقي خير كتير بإذن الله

شجعي أولادك يساعدوكي

كلنا نفسنا أولادنا يساعدونا في مهام المنزل

بس كتير بيقابلوا ده بالضجر او بيرفضوا

قريت فكرة أخت عملتها مع بنتها و نجحت حبيت انقلها لكم

البنت مش بتحب تساعد مامتها و بتعد على الكومبيوتر اوقات كتير

الأم شالت الكومبيوتر و بعد محاولات من البنت الام وافقت ترجعه بشرط ان ليها ساعة تجلسها على الكومبيوتر بعد انجاز اعمال مدتها ساعة

الام بتقول ان البنت اتغيرت بقت تعمل بنشاط خلال هذه الساعة و تبادر هي للعمل عشان تعد على الكومبيوتر

دوري على أكتر شئ بيجذب أولادك و اجعليه مكافأة على مجهودهم

اكرام الضيف واجب و خلق اسلامي فيه الاجر

عشان تقدري ترحبي بضيوفك و تكريميهم

اتعلمي صنفين حلويات زي الكيكة و البسبوسة و خلي دابما مكوناتهم متاحة عندك طريقتهم سهلة و اغلب الناس بتحبهم

كمان الفطاير المحشوة بالجبنة من الحاجات الجميلة واللي ممكن تحتفظي بيها في الفريزر

و خلي دايما عندك عصير على جنب عشان لو حد دخل عليكي فجأة
و اهم من ده كل ترحاب القلب :)

قالرسول الله-صلى الله عليه وسلم-: "من كان يؤمن بالله واليوم الآخر فليكرم ضيفه".

كلام جميل في كرم الضيافة على هذا الرابط

http://almisk.net/ar/article.php?id=1416

لوحدك مش هاتقدري

استعيني دايما بالله و انت بتعملي اي شئ و اطلبي منه العون و المساعدة و ان شاء الله ربنا هايخفف عنك حمل كتير

أي حاجة تستصعبيها ابدأي باسم الله و استعيني به سبحانه و تعالى

ربنا خلقنا ضعفاء محتاجين له سبحانه في كل وقت

و تأملي قوله تعالى " يُرِيدُ اللَّهُ أَنْ يُخَفِّفَ عَنْكُمْ ۚ وَخُلِقَ الْإِنْسَانُ ضَعِيفًا " و تأملي كمان معنى " لا حول و لا قوة إلا بالله"

و ما تتحركيش لوحدك و كوني مستعينة بالله

لتعارفوا

عشان تحسي إن بيتك واسع رحبي بالضيوف وكل ما زادو حبايبك كل ما حسيتي ان الدنيا واسعة وجميلة من حواليكي

البيوت تحلى باللمة خلي بيتك دايما عامر و مضياف و يحب الناس

و احلى ما في الحياة هو التواصل و المودة

من وقت لاخر ادعي المقربين لزيارتك و اعدي الشاي و الكيك فالحياة لا تحلو الا بمشاركة محبينا

و اعرفي ان أي اختلاط بيكون فيه بعض الحاجات ممكن تضايق مثلا كلمة أو تصرف

لكن ما تخليش ده عذر للوحدة والإنطواء

و افتكري قول رسولنا الكريم صلى الله عليه و سلم
المؤمن الذي يخالط الناس ويصبر على أذاهم، خير من الذي لا يخالط الناس ولا يصبر على أذاهم "

الأصل في ديننا إننا نخالط الناس و نعاشرهم

لأن العزلة كما يقول أحد الصالحين ونحسبه كذلك و لا نزكيه على الله

" العزلة عبادة الضعفاء وصيد الشياطين "

وطبعا لازم نختار معرفة ذوي الخلق الكرام و نقرب منهم عشان نتعلم من بعض ونكون دايما في ارتقاء

و تذكري قوله تعالى

عليكي بسورة البقرة

استعيني في بيتك بقراءة سورة البقرة و تذكري دائما أنها تنفر الشيطان من البيت 

عن رسول الله صلى الله عليه وسلم أنه قال: اقرأوا سورة البقرة فإن أخذها بركة وتركها حسرة ولا تستطيعها البطلة .

لا تنسيني من دعوة صالحة بأن يوفقني الله  لقراءة سورة البقرة و أن يرزقني بركتها

بيتك الصغير واسع بقلبك

السلام عليكم و رحمة الله وبركاته
بداية احب اعرفكم بنفسي
انا أم لطفلين و ربة منزل بالرغم إني من خريجات كليات القمة زي ما بيقولوا :) إلا إني فضلت ألا أعمل و اهتم بالأولاد و أمور المنزل لأني عايشة في بيت صغير قابلتني مشكلة و هي ازاي اقدر اخلي بيتي واسع و الاقي مكان لكل حاجة .
افكار كتير ومحاولات عديدة عشان انظم الدنيا بس توصلت لحاجة ان الوسع مش في المكان ، الوسع في البال الواسع والصدرالرحب كل ما قلبك يتسع للي حواليكي هاتلاقي الدنيا واسعة من حواليكي و ربنا بإذن الله هايوسع عليكي ، و اهم حاجة الانسان يحاول يتعلم الصبر و يكون صبور مع نفسه و مع اللي حواليه .
و ده برده ما يمنعش ان احنا نتعلم ازاي ننظم بيوتنا عشان الكل يكون فيها مرتاح بإذن الله
هشان كده في المدونة دي هاشرككم بإذن الله افكار تساعد في ترتيب البيوت الصغيرة و تنظيمها و لكن قبل كل شئ نخلي نيتنا في كل عمل بنعمله طلبا لرضا الله سبحانه و تعالى .
قبل ما تعملي حاجة في بيتك راجعي نوايكي و خليها خالصة لله وحده و اسألي نفسك بتتظفي بيتك و تنظميه ليه ؟!
اجابة السوال ده ممكن تكون نوايا خير كتيرة تثابي عليها ان شاء الله .