مكان واحد لكل شيئ متشابه

بسم الله والصلاة والسلام على رسول الله
من ابسط قواعد التنظيم والترتيب هو اننا نضع كل شيئ متشابه مع بعضه في مكان واحد اما في درج او درفة علبه او شنطه ده بيساعدنا جدا وقت الترويق وكمان لما بنحتاج لحاجة بنبقى عارفين مكانها بسهوله
مثلا درج للايشاربات
درج للشاربات
 درج للشواحن والبطاريات
علبه لأدوات الخياطه
علبه او شنطة للاقلام
لو حاجة بيبي يبقى ليها مكان
مكان واحد لتخزين ملابس الشتاء او الصيف ويفضل يكون سهل اعلى رف في الدولاب مثلا
ملابس المناسبات
مكان للبطاطين ممكن احد السراير يخزن تحته البطاطين
لو بنخزن تحت السرير يبقى السرير الكبير نخزن تحته الحاجات اللي نادر ما بنستخدمها والصغير الحاجات الموسميه زي بطاطين او كوفرتات او لعب اطفال
لو ملابس جديدة تبقى مع بعضها
في المطبخ مثلا درفة لحاجة الضيوف
درفة للمشروبات شاي قهوة سحلب
وهكذا

المقصود ان يبقى مكان واحد لكل حاجة شبه بعضها عشان وقت ما نحتاج اي حاجة ما نحتاجش ندور في كذا مكان ونلاقي حاجتنا بسهوله ويسر باذن الله
دمتم في رعاية الله وحفظه

حفظ الاشياء الصغيرة

بسم الله والصلاة والسلام على رسول الله
يمكن طول ما احنا بنروق بنلاقي حاجات صغيرة كتير محتاجه يكون ليها مكان مخصص
هذه الاشياء تحتاج لعلب صغيرة لحفظها بحيث عندما تقع عينك على الشيئ تعلمين اين تحتفظين به
ومثال على ذلك الالوان والاقلام والبرايات يمكنك الاحتفاظ بكل ما يتعلق بالتلوين والكتابة في شنطة ميك اب تخصصيها لذلك ونعود الاولاد ايضا ان اي قلم مكانه هذه الشنطة
ادوات الخياطه تحتاج الي علبة
اللعب صغيرة الحجم كاللعب التي تاتي هدية مع الشوكولاتة تحتاج ايضا لعلبة
الميك اب يحتاج لشنطة او علبة
وهكذا اي شيئ متشابه مع بعضه
والله المستعان

ترتيب الاولويات

بسم الله
والصلاة والسلام على رسول الله
لكل بيت ظروف ونظام حياة بيختلف عن التاني
عشان كده ممكن تلاقي جداول شغل البيت منتشرة على النت وتجربي ومش نافع خاصتا لو معاكي اطفال كل واحد ليه نظامه المناسب مع ظروفه
ومن الافضل انك كل صباح او من بالليل قبل ما تنامي تفكري ايه اللي محتاج يتعمل وايه اهم من ايه واول حاجة هتبدءي بيها قيمي يومك والمطلوب منك ووازني بين اعمالك
ويكون مقياسك في ده اكتر حاجة مضايقاكي وهتفرحي لما تنجزيها او حاجة زوجك موصيكي عليها او حد من اولادك الحاجة المهة اللي هتعمل فرق وهتريحك وتريح اللي حواليكي دي اللي تبدءي بيها
والحاجة اللي مش فارقة خليها في الاخر
يعني مثلا ممكن الدولاب محتاج ترتيب والريسيبشن محتاج تنضيف ومسح اخلي الدولاب للاخر وابدء بالمهم
بس في حاجات بسيطة ممكن تكون ثابتة الصبح زي فرش السراير وفتح الشبابيك للتهوية حتى لو مش هتبدءي بغرف النوم خلي ده ثابت معاكي هتحسي بفرق في نشاطك كتير
ودايما قبل كل شيء الاستعانة بالله والتوكل عليه سبحانه
بنحتاج لمساعدة ربنا في كل وقت من غير معونته وتيسيره ابسط الامور ممكن تلاقيها بقت صعبة
وانت بتصلي اقري سورة الفاتحة بتدبر واستشعري طلب المعونة في " اياك نعبد واياك نستعين " ❤

تنظيف الحائط

بسم الله
والصلاة والسلام على خير خلق الله سيدنا محمد وعلى اله وصحبه
يكاد لا يخلو بيت به اطفال الا وقد قام الاطفال بعمل لوحات فنية على الحيط سواء بالوان شمع او اقلام رصاص او جاف
الفكرة هي ازاي نغسل الحيط
الموضوع محتاج بعض المجهود
يمكن تجهيز طبق بلاستيك ووضع كلور مركز وقليل من الماء وصابون سايل
سنحتاج لسلكة مواعين لدعك الحائط وجوانتي لحماية يدك من الكلور
ايضا قطعة قماش مبللة ومعصورة لنمسح بها مباشرتا بعد الدعك وتغسل من وقت لاخر وتعصر وهكذا حتى ينضف الحيط
يفضل ان اطفالك يكونوا نايمين او غير موجودين بالمنزل اذا كان هناك مساحة كبيرة من الحاءط تحتاج للغسل
ملحوظة اذا كنت تخشين تاثير الكلور على البياض يفضل ان تخفيفه
بالنسبة للاقلام الجاف يمكن ايضا رش الكحول لازالتها

حفظ المستندات

يمكنك تخصيص شنطة لجمع الاوراق الهامة الخاصة بك وباسرتك مثل شهادات الميلاد شهادات المدارس جوازات السفر كل تلك الامور يمكنك جمعها في شنطة ليسهل العودة اليها عند الحاجة

خصصي درج للشاحن او التابلت

السلام عليكم
بسم الله والصلاة والسلام على رسولنا المصطفى عليه افضل الصلاة والسلام
بتتسالي كتير على مكان الشاحن او مكان التابليت او الاي باد
ممكن ببساطة تخصصي درج الكل يعرفه بما فيهم الخادمة لو في
اي شاحن او تباليت او اي باد اي حاجة من الحاجات دي تتحط في الدرج ده
واي حد يلاقيهم في غير المكان ده يرجعهم للدرج وبكده ان شاء الله يبقى مكان الحاجات دي معروف للجميع
وتذكريني بدعوة جميلة بحسن الختام

تنظيف المساحة اسفل السرير

السلام عليكم ورحمة الله وبركاته
اغلب سراير غرف النوم اصبحت مغلقة من الجوانب وكتير بنخزن تحتها حاجات كتير
بالرغم من ان اسفل السرير مغلق لكن برده التراب بيدخل وبيحتاج يتنظف من حين لاخر
يمكن رفع المرتبة واخراج ما تحت السرير ومسح الاغراض للتخلص من التراب ومسح الارضية بماء وديتول ثم تجفيفها واعادة الاغراض مرة اخرى

تنظيف سطح الدولاب

السلام عليكم و رحمة الله
من الأماكن اللي مش بنقدر نوصلها و بتحتاج تنظيف أيضا من وقت للاخر هي اسطح الدولايب في الغرف
يمكن تنظيفها بالمكنسة الكهربائية او مسحها بقطعة قماش كبيرة مبللة و معصورة جيدا وتكرار المسح عدة مرات حتى يتظف جيدا
ويمكن بعد الانتهاء فرش اوراق الجرائد او ملاية شرشف قديم ينغسل من وقت للتاني
دمتم في حفظ الله ورعايته 

دولاب الحمام

من الحاجات الجميلة و بتساعد وجود دولاب بالحمام بأي حجم ممكن

يوضع به الصابون و الكريمات و المساحيق و ان كان حجمه كبير ممكن ايضا وضع الفوط به
الدولاب ده ممكن يبقى داخل الحمام او في الطرقة جنبه