اساسيات التعامل مع حوض المطبخ

بسم الله والصلاة والسلام على رسول الله
حابة ادردش معاكم حبيباتي عن اهم حتى في المطبخ وهي الحوض والحقيقة ان نضافة المطبخ والارتياح فيه بيتلخص في حوض نضيف فاضي
طيب
ايه هي وظيفة الحوض
سؤال سهل ولكن في الحقيقة اوقات مش بنركز في وظيفته الحقيقية وبنستخدمه استخدام خاطئ
وظيفة الحوض هي الغسل نغسل مواعين فاكهة خضار لحوم اي حاجة محتاجين نغسلها متعلقة بالطعام
حلو اوي
ايه بقى الاستخدام الخاطئ
الاستخدام الخاطئ ان واحنا شغالين كل حاجة نرميها في الحوض بغض النظر هنغسلها دلوقتي ولا لا
طيب ايه المشكلة
المشكلة في نقطتين لو الحاجات طولت في الحوض وغسلتي فوقيها حاجات تانية الحاجة بتزداد اتساخ وممكن تتزفر
والنقطة التانية والاهم هي انك لو محتاجة تطبخي او تغسلي او داخلة تعملي كيكة والحوض مليان ده بيوتر وبيخليك مش مرتاحة وانت بتشتغلي وحاسة بربكة مش فهماما والحقيقة بيكون سببها الحوض المليان
.
.
.
خديها قاعدة واحفظيها ما ينفعش نشتغل في المطبخ إلا والحوض فاضي
حتى لو هنأجل غسل حاجات تبقى على مكان قريب من الحوض مش في الحوض ابدا
لو لابد تحطي حاجات في الحوض يبقى حاجات صغيرة تبقي عارفة انك وقت ما هتحتاجي الحوض هتغسليها في ثانية وتكملي شغل

نقطة كمان ما نغسلش حاجة فوق حاجة لو حاجة في الحوض يبقى هي الاول ما نغسلش فوقيها
بس كده ويارب ننعم بحوض رايق جميل يخلي وقفتنا في المطبخ اسهل وايسر بإذن الله

اطقم الكاسات والفناجين الغير مستخدمة

السلام عليكم ورحمة الله وبركاته

اعتدنا جميعا ان نتخلص من الفائض من الملابس والزائد عن الحاجة واعطائه للفقراء وفي الحقيقة ان هناك اشياء اخرى تكون زائدة عن حاجتنا مثل الكاسات وفناجين القهوة

احيانا كثيرة نعجب بطقم ونشتريه ثم نشتري اخر ومع الوقت نجد عندنا اطقم لا نستخدمها في التقديم ولا للزينة وقد تكون اصبح موديلها قديم في نظرك ولن تستخدميها 

هناك فتيات فقيرات قد تفرحن كثيرا اذا اهديتها طقم وخادمتك ايضا قد تسعد كثيرا اذا اعطيتها واحد

لا اقصد تخلي نفسك من غير ولا شيئ ولكن اذا وجدتي مطبخ اصبح مليئ بطريقة زائدة عن الحاجة او شيئ لا تتوقعين له استخدام فاعطيه لوجه الله واسعدي به غيرك

اسهل طريقة لغسل المواعين

السلام عليكم ورحمة الله وبركاته
بسم الله والصلاة والسلام على رسول الله
في بعض الاوقات قد تتراكم المواعين التي تحتاج لغسل لسبب او لاخر قد يكون عزومة او بسبب انشغال وقد تشعرين ان الامر ليس له بداية من نهاية ونتسائل ترى ما الحل في التعامل مع هذا الكم من المواعين
اول شيئ نستعين بالله ثم نقسم المواعين لقسمين بحيث نملئي انائ كبير بالماء والصابون ونضع به المعالق والاكواب والاطباق ولا نبدا به الان بل نتركه جانبا ونفرغ الحوض و نبدا بغسل الاواني الكبيرة واللي فيها زيارة لانها سرعان ما ستشعرنا بالانجاز وان المطبخ بدا يروق وبعد الانتهاء منهم نغسل الحوض بكلور وصابون ثم نبدأ في غسل باقي المواعين التي تركناها جانبا بحيث نغسلها ونجمعها في الحوض ثم نشطفها

ملحوظة: الحوض الفاضي اكتر حاجة بتسهل غسل المواعين ما نغسلش ابدا في حوض فيه مواعين

وباختصار نفصل الصغير عن الكبير ونبدا بالاشياء الكبيرة وكنت قرات في مقال لاخت جزاها الله خير تنصح بان لا ندع الصغير ياكل وقتنا

وما توفيقي إلا بالله
مع امنياتي لي ولك بمطبخ رايق ونضيف :)

ادوات المطبخ بين الحاجة والفوضى

السلام عليكم ورحمة الله وبركاته
تتقدم الحياة و تطور وكل يوم تظهر ادوات واختراعات هدفها هو راحة الانسان
وبالطبع وصل هذا التطور الي المطبخ وتحول من المطبخ التقليدي بادواته البسيطة الي المطبخ العصري بالاجهزة الحديثة والادوات العديدة
في هذا المقال لا اريد ان اتحدث عن الاجهزة الكبيرة ولكن عن ادوات المائدة واعداد الطعام

فالكثير من النساء تشتري العديد والعديد ظنا ان هذا الامر سيريحها وقد ينقلب الامر ضدها فبعد ان كان مطبخها بسيط اصبح مكتظ بالادوات التي تحتاج الى تنظيف وعناية مستمرة
انا شخصيا عدوة اي شيئ حجمه صغير الحاجات اللي بتملى الادراج وتعمل كركبة مالهاش داعي بكون حذرة جدا في شرائها
فنجد مثلا بدل من هرس البطاطس بالشوكة اصبح هناك هراسة بطاطس
وبدل من الاحتفاظ بطقم او طقمين كاسات واخر شاي واخر قهوة للضيوف نجد العديد من هذا وذاك
حتى الفشار الذي يمكن ان نقوم باعداده بمنتهى السهولة في حلة من اي مقاس اصبح له ماكينة خاصة
أصبحنا بنجدد الحلل ونشتري جديد ونحتفظ بالقديم في حين ان اهالينا كانوا بيطبخوا بعدد بسيط من الحلل والطواجن وكانت بتعيش معاهم العمر لا بيفكروا يغيروا ولا يجددوا
الارز اصبح له ماكينته الخاصة
الكيك ظهرت له قوالب السيليكون وقوالب باشكال والوان
وماكينة لتحميص الخبز واخرى لصنع البيتزا وماكينة لصنع القهوة
ماذا لو اقتنينا كل هذه الاشياء
نجد انه بدلا من الراحة المنشودة اصبح الامر اكثر تعقيدا واصبح الامر يحتاج لوقت اكثر في التنظيف واعادة الاغراض لمكانها وتوفير مكان لتخزينها
قد تبدو رفاهية ولكنها في الحقيقة تكلفك المزيد من الوقت والجهد
القاعده انه متى ما تحقق الستر فلا داعي للمزيد طالما عندك ما يسترك في بيتك ومع ضيوفك فالاكثار عبئ ليس له داعي وعلينا ان نفكر في ما نحتاجه فعلا وليس الاقتنائ لمجرد الاعجاب بالادوات او لان صديق نصح بها
وان كنتي تريدي التجديد فتخلصي من القديم اعطي للفقراء هتستفيدي انك ساعدتي حد وفي نفس الوقت حافظتي على مطبخك هادي وبسيط
دمتم في رعاية الله

تنظيف الثلاجة

من اسهل الطرق لتنظيف الثلاجة هو تنظيفها اول باول تماما كسطح رخامة المطبخ والبوتجاز
ولا داعي لاهمالها والاضطرار لفكها من الكهرباء وغسلها كاملة الامر الذي يتطلب وقت وجهد مخصص يستغرق اكثر من تنظيفها اول باول

تخلصي من فوضة المواعين

السلام عليكم
و الصلاة و السلام على نبينا محمد و على اله و صحبه و سلم
يمكن اغلب البيوت في عالمنا العربي بتعتمد الطريقة التقليدية في غسل المواعين و هي غسلها باليد و في البعض طبعا بيستخدم غسالة الاطباق
لو بتغسلي المواعين بنفسك و ما فيش حد بيساعدك في الموضوع ده و بتطبخي و بتخرجي تقضي مشاوير
ممكن تيجي في يوم تلاقي المواعين اتراكمت و ملت المطبخ و تقفي تغسلي و تقضي وقت في غسلها و اعادة ترتيب المطبخ
و ده سببه مش بس انك كنت مشغولة و لكن ايضا كثرة الاطباق و الاكواب اللي حطاها للاستخدام في المطبخ
وده كان بيحصلي كتير و يزعجني لحد ما كنت بحكي مع اختي و اقترحت عليا اقتراح كان بالنسبة لي في منتهى الروعة
الحل كان اني اقلل الاطباق و الكوبايات و  المعالق المتاحة للاستخدام اليومي و اشيل الباقي في البوفيه او دولاب المطبخ و ما استخدمش منهم الا في حالة و جود ضيوف و ارجعهم مكانهم بعد كده
باختصار مش كل المواعين تبقى متاحة طول الوقت
بالطريقة دي حتى لو لأي ظرف اتأخرتي في غسل المواعين المطبخ مش هيتقلب أوي و مش هياخد وقت
كانت فكرة ممتازة و الحمد لله فرقت معايا كتير
بالظبط زي ما بنروح مصيف شوفي الحاجات بتبقى قليلة و بنعمل كل حاجة و دايما المطبخ بيفضل رايق و نظيف
بسطي حياتك هتلاقيها بسيطة

التنظيف العميق للمطبخ

السلام عليكم و رحمة الله و بركاته
كل سنة و انتم طيبين
كنت اتمنى اكتب موضوع المطبخ ده من مدة بس كنت مشغولة شوية
بالنسبة للمطبخ قبل رمضان أغلبنا بيحب ينضفه تنضيفة عميقة عشان يكون مريح لينا طول الشهر خاصتا لو عندنا عزايم في شهر الخير ويفضل تنضفيه قبل بمدة عشان تدي لنفسك راحة
عشان كده حبيت اكتب عن خطوات لتنضيفه بعمق
بسم الله نبدا
عادتا لما بنضف اي حاجة بناخدها من فوق لتحت
اول حاجة ننضف الجزء اللي فوق الدولاب والتلاجة بحيث ننضف فوق الدولاب بليفة و صابون و نفس الشئ بالنسبة للحوائط فوق الدولاب
بعد كده ناخد الدرف العلوية نمسح ابوابها من الداخل و الخارج و الشباك ناخده في نفس مرحلة الدرف العلوية
المرحلة الي بعد كده الرخامة ننظمها و اي شئ عاوز رمي نتخلص منه و اي شئ محتاج يدخل في الدرف ندخله و نغسل السيراميك اللي فوقها و نمسحه
بعد كده الدرف اللي في الاسفل بنفس الطريقة
وبعدهم نحرك التلاجة ونكنس ونمسح وراها ونمسح جسم التلاجة من الخارج ومن فوقها
وبعد كده تحريك البوتجاز وغسل الارضية اسفل منه ودعك جوانبه والحاءط بجانبه بالماء والصابون وتنشيف الارض وارجاعه لمكانه
ولو غسالة اطباق نفس الشيئ
وفي الاخر مسح الارضية اللي هي وسط المطبخ لان كل الحاجات اللي حركناها مسحنا تحتها ورجعناها مكانها
ممكن قبل ما تعملي الموضوع ده بيوم ترتبي الدولاب وتخرجي الزايد لو حاسة ان الدولاب من جوا محتاج ترتيب او التلاجة من جوا محتاجة ترتيب
وبكده يبقى كل حتى في المطبخ بقت نضيفة
دمتم في رعاية الله
 والله المستعان


 كل عام و انتم بخير

إختيار حوض المطبخ

يعتبر حوض المطبخ من الأمور الهامة في المطبخ

و الذي يترتب على اختياره عادات خاصة بنظافة المطبخ

لذا عليك عند اختياره معرفة طبيعة عملك في المطبخ أولا

فمثلا لو معتادة تطبخي بشكل يومي لازم الحوض يكون كبير لان ده بيسهل عليك في اعداد الطعام حتى وان كان عندك غسالة صحون
فاثناء اعداد الطعام ستجدين نفسك بحاجه لحوض متسع يسهل المهمة 

ويوجد احواض بعين واحدة واحواض باثنين وده بيكون حسب ارتياحك وطريقة استخدامك ولكن إذا اخترتي الحوض بعين واحدة ابتعدي تماما عن الاحواض الصغير وعن الدائري مثل هذه الأحواض تصلح لاستخدام فرد وليس مطبخ يعد فيه الطعام لأسرة 

وللحفاظ على المطبخ جاف بدون طرطشة الماء خارج الحوض يفضل ان يكون متسع وله مصفاة ملحقة كما بالصورة

المصفاة دي جميلة جدا لما تكوني بتقطعي دجاج او لحم تحطي القطاعى عليها وبعد ما تخلصي شغل تغسليها والمياه تنزل مباشرتا في الحوض

 واخيرا بكرر بلاش الاحواض الصغيرة اللي طالعة جديد واللي من غير مصفى 🥰🥰❤️

البقوليات

احتفظي بالبقوليات في برطمانات زجاج أو بلاستيكية هاتكون اسهل في الاستخدام و تحميها من السوس

ضعي ورق جرائد بسلة القمامة

يمكنك وضع ورق جرائد أسفل الباسكت و من وقت لاخر نغير الورق و نقون بغسل الباسكت وتنشيفه ووضع ورق جديد متى دعت الحاجة لذلك

غلفي سطح دولاب المطبخ

يمكنك تغليف سطح دولاب المطبخ بورق فويل يلصق بالسيلوتب 
ويمكن وضع ورق الجرائد فوقه

و بكده تحمي الدولاب من التصاق الدهون و الاتربه

فيصبح سهل التنظيف و لن تحتاجي لتغيير الورق كثيرا قد يبقى عدة سنوات لان تنظيفه سهل جدا وبسيط

ودي صورة مش من تصويري جزاها الله خير اللي صورتها ورفعتها

اعيدي استخدام برطمانات النسكافيه

برطمانات النسكافيه شكلها جميل و مميز

يمكنك اعادة استخدامها بحيث يستخدم الحجم الكبير للبقوليات و الشعرية مثلا

و الحجم الصغير ممكن استخدامه للتوابل وتكوين طقم جميل

برطمانات التوابل

يمكن استخدام حجمين لبرطمانات التوابل حجم كبير للاوراق العطرية او التوابل الخشبية وحجم أصغر للتوابل البودرة لتوفير المكان والمساحة ولخفة وزنها وسهولة استخدامها كما ان شراء كميات قليلة من التوابل افضل من تخزين كميات كبيرة قد تفقد رائحتها ونكهتها مع الوقت

حفظ الأرز و السكر

احتفظي بالسكر و الرز في علب بلاستيك 

و ممكن تخلي الكوباية او المكيال في العلبة

و بكده تستخدميهم بسهولة و تحميهم من النمل ويفضل الدولاب نظيف و مرتب

ترتيب علب حفظ الطعام

من الأشياء التي تستخدم بكثرة وقد تسبب بعض الفوضى في المطبخ كثرة العلب البلاستيكية
بالنسبة لي فالطريقة التي توفر الوقت والجهد هي وضع كل علبة بغطائها داخل العلبة الاكبر منها حيث اجدها جافة نظيفة ومن دون عناء البحث عن الغطاء وقت الحاجة اليها

أترككم في حفظ الله و رعايته