اساسيات التعامل مع حوض المطبخ

بسم الله والصلاة والسلام على رسول الله
حابة ادردش معاكم حبيباتي عن اهم حتى في المطبخ وهي الحوض والحقيقة ان نضافة المطبخ والارتياح فيه بيتلخص في حوض نضيف فاضي
طيب
ايه هي وظيفة الحوض
سؤال سهل ولكن في الحقيقة اوقات مش بنركز في وظيفته الحقيقية وبنستخدمه استخدام خاطئ
وظيفة الحوض هي الغسل نغسل مواعين فاكهة خضار لحوم اي حاجة محتاجين نغسلها متعلقة بالطعام
حلو اوي
ايه بقى الاستخدام الخاطئ
الاستخدام الخاطئ ان واحنا شغالين كل حاجة نرميها في الحوض بغض النظر هنغسلها دلوقتي ولا لا
طيب ايه المشكلة
المشكلة في نقطتين لو الحاجات طولت في الحوض وغسلتي فوقيها حاجات تانية الحاجة بتزداد اتساخ وممكن تتزفر
والنقطة التانية والاهم هي انك لو محتاجة تطبخي او تغسلي او داخلة تعملي كيكة والحوض مليان ده بيوتر وبيخليك مش مرتاحة وانت بتشتغلي وحاسة بربكة مش فهماما والحقيقة بيكون سببها الحوض المليان
.
.
.
خديها قاعدة واحفظيها ما ينفعش نشتغل في المطبخ إلا والحوض فاضي
حتى لو هنأجل غسل حاجات تبقى على مكان قريب من الحوض مش في الحوض ابدا
لو لابد تحطي حاجات في الحوض يبقى حاجات صغيرة تبقي عارفة انك وقت ما هتحتاجي الحوض هتغسليها في ثانية وتكملي شغل

نقطة كمان ما نغسلش حاجة فوق حاجة لو حاجة في الحوض يبقى هي الاول ما نغسلش فوقيها
بس كده ويارب ننعم بحوض رايق جميل يخلي وقفتنا في المطبخ اسهل وايسر بإذن الله

اسهل طريقة لغسل المواعين

السلام عليكم ورحمة الله وبركاته
بسم الله والصلاة والسلام على رسول الله
في بعض الاوقات قد تتراكم المواعين التي تحتاج لغسل لسبب او لاخر قد يكون عزومة او بسبب انشغال وقد تشعرين ان الامر ليس له بداية من نهاية ونتسائل ترى ما الحل في التعامل مع هذا الكم من المواعين
اول شيئ نستعين بالله ثم نقسم المواعين لقسمين بحيث نملئي انائ كبير بالماء والصابون ونضع به المعالق والاكواب والاطباق ولا نبدا به الان بل نتركه جانبا ونفرغ الحوض و نبدا بغسل الاواني الكبيرة واللي فيها زيارة لانها سرعان ما ستشعرنا بالانجاز وان المطبخ بدا يروق وبعد الانتهاء منهم نغسل الحوض بكلور وصابون ثم نبدأ في غسل باقي المواعين التي تركناها جانبا بحيث نغسلها ونجمعها في الحوض ثم نشطفها

ملحوظة: الحوض الفاضي اكتر حاجة بتسهل غسل المواعين ما نغسلش ابدا في حوض فيه مواعين

وباختصار نفصل الصغير عن الكبير ونبدا بالاشياء الكبيرة وكنت قرات في مقال لاخت جزاها الله خير تنصح بان لا ندع الصغير ياكل وقتنا

وما توفيقي إلا بالله
مع امنياتي لي ولك بمطبخ رايق ونضيف :)

45 دقيقة تنظيف يومي

بسم الله
و الصلاة و السلام على حبيبنا المصطفى و على اله و صحبه و سلم
السلام عليكم و رحمة الله و بركاته
كلنا طبعا نحب بيوتنا تبقى رايقة و نضيفة باستمرار و في ناس بتنجح في كده فعلا و في ناس لسا بتجرب و بتحاول خاصتا المتجوزين حديثا ، بصفة عامة البيت ببحتاج تنظيف كامل كل ركن و شباك حوالي كل اسبوعين او شهر حسب طبيعة المكان اللي ساكنة فيه و حسب طبيعة حياتك واسرتك
الفترة ما بين التنظيفة العميقة و الاخرى بيبقى البيت محتاج عناية

اذا كنت ببيت صغير هنحتاجي حوالي 45 دقيقة في الصباح كافية لاعادة ترتيب الاشياء و كنس و تمليع المنزل بدون جلانس فقط ازالة الاتربة بقطعة قماش جافة ومن غير المطبخ
و ممكن اضافة ربع ساعة اذا كانت الارضيات تحتاج لمسح او عشر دقائق لتلميع المرايا
45 دقيقة كافية بإذن الله بشرط أن تكون متواصلة و ممكن في بداية الأمر تظبطي تايمر الموبيل على المدة بحيث يكون عندك حافز لان الوقت هيخلص و بعد كده هتلاقي نفسك مش محتاجة للتايمر و هتكتشفي ان الموضوع اسهل بكتير من انك تعملي جداول
و اتبعي احساسك في الترتيب يعني ممكن تبدأي بالجزء اللي حاسة انه مضايقك شكله و هكذا لأن النظافة حس اكتر من انها جدول او نظام معين
و قبل كل شئ سمي الله و استعيني به سبحانه و تعالى هو القوي القادر على مدك بالمقدرة و الطاقة و العزيمة في كل أمور حياتك
و اسألي الله دائما التيسير
ربنا ييسر لنا جميعا احوالنا و يرضى عنا و يرزقنا حياة هادية كلها محبة و تراحم

عادة #4 روتين صباحي

اتكلمنا عن ثلاث عادات ممكن تساعدنا على حفظ نظافة و نظام البيت
و انهاردة هانتكلم عن العادة الرابعة و الأخيرة بإذن الله
وهي

 روتين صباحي

حاجات معينة ثابتة بتعمليها كل يوم الصبح

و كل ربة منزل بتظبط الروتين ده على حسب ظروفها

يعني مثلا المرأة العاملة اكيد ليها روتين مختلف عن المرأة التي في المنزل

و الام لها روتين مختلف عن المتزوجة حديثا

المقصود ان الروتين ده مش حاجة معينة تنطبق على كل ربات البيوت

بس لازم يكون ليكي نظام للصباح
مثال لنظام يمكن موجود في اغلب البيوا

قراية الاذكار و فرش السراير و فتح الشبابيك للتهوية و اخراج ما تنوي طهيه للغداء و كوب شاي

مش لازم يكون روتين معقد بالعكس يكون بسيط ومهم أفضل و يساعدك انك تبدأي يومك بلمسة نظام

و تتشجعي تنقلي لأعمال أخرى 

عادة #3 تنظيف المطبخ قبل النوم

اتفقنا ان ما فيش بيت هايبقى نظيف ومرتب من غير ايد ممدودة ليه

 عشان كده عادتنا انهاردة و اللي عاوزين نطبقها مع بعض هي

 تنظيف المطبخ قبل النوم

 لأن اجمل حاجة انك تصحي الصبح مطبخك نظيف هتلاقي ده بينعكس على نفسيتك و افراد أسرتك و بيوفر عليكي وقت كتير في اليوم الجديد و بيساعدك في تنظيم بقية يومك .

من النهاردة  بإذن الله كل يوم ننام و مطبخنا نظيف ، المواعين مغسولة و الرخامة نظيفة و لو الارض محتاجة مسحة سريعة .
يلا اتشجعي معانا و دخلي عادة طيبة لحياتك و افتكري دايما ان النظافة عادة .
هانستمر مع بعض لمدة أسبوع و بلغينا بالنتايج .

من طلب الراحة ترك الراحة

قال ابن القيم : المكارم منوطة بالمكاره ، والسعادة لا يُعْبَر إليها إلاَّ على جَسْر الْمَشَقَّة ، فلا تُقْطَع مَسافتها إلاَّ في سفينة الجد والاجتهاد ...

وقد قيل : مَن طَلب الرَّاحَة تَرَك الرَّاحَة . 

وقال رحمه الله : المصالح والخيرات واللذات والكمالات كُلّها لا تُنَال إلاَّ بِحَظٍّ مِن الْمَشَقَّة ، ولا يُعْبر إليها إلاَّ على جَسرٍمِن التعب .

وقد أجمع عقلاء كل أمة على أن النعيم لا يُدْرَك بالنعيم ، وإن مَن آثر الراحة فاتته الراحة ، وإن بِحَسَب رُكوب الأهوال واحتمال الْمَشَاقّ تَكون الفرحة واللذة ، فلا فَرْحة لِمَن لا هَمّ له ، ولا لَذَّة لِمن لا صَبر له ، ولا نَعيم لِمن لا شَقَاء له ! ولا راحة لِمن لا تَعب له ، بل إذا تَعِب العبد قليلا استراح طويلا ، وإذا تَحَمَّل مَشَقَّة الصبر ساعة قادَه لِحَياة الأبد ، وكل ما فيه أهل النعيم المقيم فهو صبر ساعة ، والله المستعان ، ولا قوة إلا بالله ، وكلما كانت النفوس أشرف والهمة أعلا كان تَعَب البَدَن أوْفر ، وحَظّه مِن الرَّاحَة أقَلّ . اهـ . 

فإذا كان أهل الدنيا يَتْرُكون الراحة في سبيل الدنيا .. فأهل الآخرة وطُلاّبها أولى بذا .. 

الموضوع منقول

أقل من دقيقتين

في حاجات كتير في البيت مش بتاخد أكتر من دقيتين

و لأنها مش بتاخد اكتر من كدة البعض بيشوف الحاجة محتاجة تتعمل و ما يهتمش ليها

واللي بيحصل ان الحاجات دي بتتراكم و تبقى فوضى في الاخر

عشان كده لو ورقة في الأرض كوباية محتاجة تتغسل او ملابس محتاجة توضع في سلة الغسيل

اعمليها في الحال أول ما عينك توقع عليها و اتبعي حسك اتجاهها

و ما تأجليش و ما تقوليش بعدين هاعملها طالما أقل من دقيقتين يبقى اعمليها في الحال 

و تاخدي من وقتك دقيقتين اسهل من انك تحتاجي لانك توفري ساعة كاملة متواصلة لانجاز مجموعة حاجات كانت ممكن تتعمل في دقيقتين

جربي و هاتلاقي بإذن الله بيتك مرتب و نظيف لحد كافي
البيت النظيف سببه الى حد كبير خلاصة اعمال بسيطة بتقوم بها ربة المنزل باستمرار

كل دي أسباب و ما تنسيش الاستعانة بالله لأن التوفيق من عنده وحده