شجعي أولادك يساعدوكي

كلنا نفسنا أولادنا يساعدونا في مهام المنزل

بس كتير بيقابلوا ده بالضجر او بيرفضوا

قريت فكرة أخت عملتها مع بنتها و نجحت حبيت انقلها لكم

البنت مش بتحب تساعد مامتها و بتعد على الكومبيوتر اوقات كتير

الأم شالت الكومبيوتر و بعد محاولات من البنت الام وافقت ترجعه بشرط ان ليها ساعة تجلسها على الكومبيوتر بعد انجاز اعمال مدتها ساعة

الام بتقول ان البنت اتغيرت بقت تعمل بنشاط خلال هذه الساعة و تبادر هي للعمل عشان تعد على الكومبيوتر

دوري على أكتر شئ بيجذب أولادك و اجعليه مكافأة على مجهودهم

علاقة ملابس

من الحاجات التي تبدو بسيطة و لكنها مهمة جدا في حفظ نظام غرف النوم  خاصتا في البيوت الصغيرة وجود علاقة ملابس خلف باب الغرفة و ممكن الاستعانة بأخرى ستاند في الركنة

بحيث تعلقي عليها أي لبس اتلبس و هايتلبس مرة أخرى

و الملابس النظيفة تكون في الدولاب

حاجات صغيرة لكن بتعمل فرق كبييييير

تزيين

زيني برطمانات طعام الاطفال بالجليتر و استخدميها لحفظ الحاجات الصغيرة و اعملي بيها شكل جميل في نفس الوقت

تنظيف الربيع

بعد انتهاء الشتاء و موجات البرد
يجد البعض فصل الربيع فرصة مناسبة لعمل تنظيف عميق للمنزل
بداية من غسل البطاطين و حتى تنظيف الدولايب من الداخل و التخلص من الاشياء الزائدة عن الحاجة وإصلاح ما يحتاج لإصلاح
اذا كنت تنوين فعل ذلك إليك بعض النصائح
- ابدئي بتخزين البطاطين الثقيلة و التي تأخذ مساحة كبيرة في الغرف
- يمكنك أيضا البدء بالمطبخ
لو قررتي تعملي المطبخ في يوم واحد مش مستحيل بس هايكون يوم مرهق أوي
ممكن تنظمي كل يوم درفتين بحيث تفضيهم خالص و تمسحي الدرفة و تمسحي المفارش و ترجعيهم مكانهم و بعد كده تنظمي الأشياء 
بعد ما تنتهي من تنظيم الدرف في يوم ممكن تنظفي فوق الثلاجة و فوق الدولاب و خلف الثلاجة مع غسل الحوائط باسفنجة و صابون ثم مسحها بقماشة مبتلة ثم قماش ناشف
طبعا الثلاجة مش هاتكلم عنها لان دي باستمرار بنظفها و نعيد تنظيمها
- بالنسبة للغرف أيضا كل يوم ممكن درفة من الدولاب مع التخلص من الزائد عن الحاجة و حفظ الملابس الشتوي و ارسال الجاكتات للمغسلة لتحتفظي بها نظيفة
- دولاب الحمام أيضا فضيه و اغسلي او بدلي المفارش ثم اعيدي كل شئ مكانه
- اذا كنت ترغبين في غسل الستائر انتظري حتى ينتهي موسم الأتربة و رياح الخماسين 
و كل عام و انت بخير

تخزين ملابس الشتاء

اغلبنا عندنا رف علوي في الدولاب وده بالنسبة لي افضل مكان لتخزين ملابس الشتاء لان ده بيساعدني اني اشيل الملابس بالتدريج بحيث اللي يتغسل يطبق ويتشال 
اما لو مفيش الرف ده 

فيمكن الاحتفاظ بها في شنط و وضعها في اي مكان مناسب بجانب الدولاب 
في ناس بتخزن تحت السرير لكن بفضل المكان ده يكون للبطاطين والاغطية او لعب الاطفال

و بالنسبة لملابس الخريف دي بتكون قريبه حتى لا نضطر لاخراج كل الملابس وقت الخريف

و كل عام و أنتم بصحة و سلامة

اكرام الضيف واجب و خلق اسلامي فيه الاجر

عشان تقدري ترحبي بضيوفك و تكريميهم

اتعلمي صنفين حلويات زي الكيكة و البسبوسة و خلي دابما مكوناتهم متاحة عندك طريقتهم سهلة و اغلب الناس بتحبهم

كمان الفطاير المحشوة بالجبنة من الحاجات الجميلة واللي ممكن تحتفظي بيها في الفريزر

و خلي دايما عندك عصير على جنب عشان لو حد دخل عليكي فجأة
و اهم من ده كل ترحاب القلب :)

قالرسول الله-صلى الله عليه وسلم-: "من كان يؤمن بالله واليوم الآخر فليكرم ضيفه".

كلام جميل في كرم الضيافة على هذا الرابط

http://almisk.net/ar/article.php?id=1416

إختيار حوض المطبخ

يعتبر حوض المطبخ من الأمور الهامة في المطبخ

و الذي يترتب على اختياره عادات خاصة بنظافة المطبخ

لذا عليك عند اختياره معرفة طبيعة عملك في المطبخ أولا

فمثلا لو معتادة تطبخي بشكل يومي لازم الحوض يكون كبير لان ده بيسهل عليك في اعداد الطعام حتى وان كان عندك غسالة صحون
فاثناء اعداد الطعام ستجدين نفسك بحاجه لحوض متسع يسهل المهمة 

ويوجد احواض بعين واحدة واحواض باثنين وده بيكون حسب ارتياحك وطريقة استخدامك ولكن إذا اخترتي الحوض بعين واحدة ابتعدي تماما عن الاحواض الصغير وعن الدائري مثل هذه الأحواض تصلح لاستخدام فرد وليس مطبخ يعد فيه الطعام لأسرة 

وللحفاظ على المطبخ جاف بدون طرطشة الماء خارج الحوض يفضل ان يكون متسع وله مصفاة ملحقة كما بالصورة

المصفاة دي جميلة جدا لما تكوني بتقطعي دجاج او لحم تحطي القطاعى عليها وبعد ما تخلصي شغل تغسليها والمياه تنزل مباشرتا في الحوض

 واخيرا بكرر بلاش الاحواض الصغيرة اللي طالعة جديد واللي من غير مصفى 🥰🥰❤️