اهتمي بنفسك اولا

عزيزتي المرأة أو الزوجة أو الام
ابدئي يومك بالاهتمام بنفسك ففاقد الشيئ لا يعطيه
انت اهم شخص في المنزل لأن ببساطة حالتك النفسية تنعكس على أرجاء المنزل سواء أسرتك أو المنزل نفسه
اول ساعة من النهار تكون ليكي أو حتى نص ساعة بس تاخدي دوش تغيري ملابسك تسرحي شعرك مش شرط زينه كامله بس تحسي بأنك صحيتي وفوقتي وقاعده بشكل مهندم يديك ثقة في نفسك
ما تقليش عندي شغل كتير وهاخد دوشي واغير واروق بعد ما اخلص احب اقولك ان الشغل مش هيخلص وهتفضلي طول اليوم قرفانه ومش هتلاقي الوقت ده عشان كده ابدئي بنفسك اولا
كلامي خاصتا لربة البيت شوفي الموظفة اول حاجة بتعملها تهتم بنفسها وتنزل الشغل زوجك يصحى يزبط نفسه ويروح شغله أولادك كل من حولك هذه بداية يومهم
فأنت ما تخليش مسؤوليات البيت تركبك وتبقي آخر واحدة وبعد كده تزعلي و تقولي شكلي وبقى حالي حال
اصحي وفوقي وظبطي نفسك وبعد كده كل حاجة ملحوق عليها
❤️❤️

ضعي حد للالعاب في المنزل

بسم الله والصلاة والسلام على رسول الله

العاب هنا وهناك ونروق ونشيل وترجع تتناثر الالعاب
ندوس على دي او نتكعبل في دي
ونرجع نلم اللعب
ده حال اغلب من عنده اطفال صغار واحنا اللي بنشتري الالعاب بإرادتنا
وده بالطبع حالي انا كمان
فضلت فترة طويلة من مدة للتانيه افرز اللعب وارمي المكسر
ولازالت اللعب هنا وهناك
لحد ما جيت في يوم قلت ليه ما اخليش الولاد يفرزوا معايا! !!!!

وفعلا فازوا معايا وبقيت اسالهم انت عاوز او حابب
فوجئت ان حاجات كتير مش عاوزينها غير ما كنت متخيلة وخرجنا كيس لعب كبير وباقي اللعب اتنظمت واترتبت الحمد لله
وقبل ما اخرج الكيس قعدت معاهم ووريتهم قد ايه الحاجات دي كانت مسببة لينا كركبة وقد ايه انهم كانوا بيزهقوا لنا يروقوا غرفتهم وتواعدنا ان لازم نفكر كويس قبل ما نشتري لعب تاني
وتووووووبة من اللعب الي فيها اجزاء صغيرة قطعة تروح هنا وقطعة تروح هنا واحنا ندور و نلم

ملحوظة :هذه الافكار لزوار المدونة ولا اسامح نقلها الا بذكر المصدر

ست علب مهمه في المنزل

بسم الله الرحمن الرحيم
والصلاة والسلام على سيدنا محمد

موضوعي اليوم عن علب ضروري وجودها في كل منزل بتريح كتير من التدوير هنا وهناك  والعلب هي كالتالي :
العلبة الاول :لتخزين ادوات الخياطه ودي من زمان موجودة في كل بيت
الثانيه: للنقود المعدنية او الفكة
تالت علبة: علبه او شنطة للاقلام انا باستخدم شنطة ميكب بجمع فيها اي اقلام او برايات بحيث ان اي حد من الاولاد محتاج قلم يلاقيه وكمان لما بيروقوا عرفتهم بعطيهم الشنطه واطلب منهم اي قلم يقابلهم يضعوه في الشنطة
الرابعة: للدبابيس الخاصة بالحجاب
الخامسة: للمسامير براريم اي حاجة من الحاجات دي
السادسة والاخيرة: للفواتير والكروت بضع فيها فواتير الكهربا مثلا اي كارت خاص بمحل او كذا اضعه فيها
بتريح جدا وقت الترويق ولو عندك شغالة مش هتحتار فين تحط الحاجة بالاضافة انها بتخلي الادراج مرتبة ورايقة لحد كبير
دمتم في رعاية الله

كل عام وانتم بخير

كل عام وانتم بخير بمناسبة شهر رمضان المبارك اعاده الله عليكم وعلينا بالخير واليمن والبركات 

مكان واحد لكل شيئ متشابه

بسم الله والصلاة والسلام على رسول الله
من ابسط قواعد التنظيم والترتيب هو اننا نضع كل شيئ متشابه مع بعضه في مكان واحد اما في درج او درفة علبه او شنطه ده بيساعدنا جدا وقت الترويق وكمان لما بنحتاج لحاجة بنبقى عارفين مكانها بسهوله
مثلا درج للايشاربات
درج للشاربات
 درج للشواحن والبطاريات
علبه لأدوات الخياطه
علبه او شنطة للاقلام
لو حاجة بيبي يبقى ليها مكان
مكان واحد لتخزين ملابس الشتاء او الصيف ويفضل يكون سهل اعلى رف في الدولاب مثلا
ملابس المناسبات
مكان للبطاطين ممكن احد السراير يخزن تحته البطاطين
لو بنخزن تحت السرير يبقى السرير الكبير نخزن تحته الحاجات اللي نادر ما بنستخدمها والصغير الحاجات الموسميه زي بطاطين او كوفرتات او لعب اطفال
لو ملابس جديدة تبقى مع بعضها
في المطبخ مثلا درفة لحاجة الضيوف
درفة للمشروبات شاي قهوة سحلب
وهكذا

المقصود ان يبقى مكان واحد لكل حاجة شبه بعضها عشان وقت ما نحتاج اي حاجة ما نحتاجش ندور في كذا مكان ونلاقي حاجتنا بسهوله ويسر باذن الله
دمتم في رعاية الله وحفظه

اطقم الكاسات والفناجين الغير مستخدمة

السلام عليكم ورحمة الله وبركاته

اعتدنا جميعا ان نتخلص من الفائض من الملابس والزائد عن الحاجة واعطائه للفقراء وفي الحقيقة ان هناك اشياء اخرى تكون زائدة عن حاجتنا مثل الكاسات وفناجين القهوة

احيانا كثيرة نعجب بطقم ونشتريه ثم نشتري اخر ومع الوقت نجد عندنا اطقم لا نستخدمها في التقديم ولا للزينة وقد تكون اصبح موديلها قديم في نظرك ولن تستخدميها 

هناك فتيات فقيرات قد تفرحن كثيرا اذا اهديتها طقم وخادمتك ايضا قد تسعد كثيرا اذا اعطيتها واحد

لا اقصد تخلي نفسك من غير ولا شيئ ولكن اذا وجدتي مطبخ اصبح مليئ بطريقة زائدة عن الحاجة او شيئ لا تتوقعين له استخدام فاعطيه لوجه الله واسعدي به غيرك

مفقودة من 23 سنه تبحث عن اهلها

ارجو ارسال لينك النشر
الموضوع منقول
ـــــــــــــــــــــــــــــــــــــــ
الصورة دي وانا عمري سنتين من داخل قسم ميت غمر من 23 سنه
كنت بنفس اللبس ونفس التسريحه اللي في الصورة دي لما ناس لقوني على محطة قطار ميت غمر وسلموني لدار رعاية الايتام وبعدها الدار سلمتني للقسم واتعمل محضر واتصورت الصورة اللي انتوا شايفنها دي
اتسجل في محضر العثور بالقسم وقتها لبسي ده وان سني التقديري سنتين وكمان اختطاف بغرض السرقة وده كان بسبب الجروح اللي كانت في ايدي مكان الاسورة الدهب اللي كنت لابساها وان اللى خطفني اخدها من ايدي ورماني في المحطة ومشي
عشت حياتي كلها في الدار لحد لما اتخرجت من كلية تربية وبعدها ربنا كرمني واتجوزت وعمري دلوقتي حوالي 25 سنه
املي في ربنا كبير
يااااه يا امي ... يااارب ربنا يكرمني واشوفك
بقول لاخواتي واهلي كلهم ان شاء الله هتعرفوني من صورتي لانها في نفس يوم العثور عليه ... المهم ربنا يكرمني وتوصل صورتي لحد منكم ويشوفها باذن الله
منقوووووووووول