تنظيف المساحة اسفل السرير

السلام عليكم ورحمة الله وبركاته
اغلب سراير غرف النوم اصبحت مغلقة من الجوانب وكتير بنخزن تحتها حاجات كتير
بالرغم من ان اسفل السرير مغلق لكن برده التراب بيدخل وبيحتاج يتنظف من حين لاخر
يمكن رفع المرتبة واخراج ما تحت السرير ومسح الاغراض للتخلص من التراب ومسح الارضية بماء وديتول ثم تجفيفها واعادة الاغراض مرة اخرى

اي حاجة قديمة للبيع :)

السلام عليكم ورحمة الله وبركاته
والصلاة والسلام على سيدنا محمد صلى الله عليه وسلم
بدات روايح الشتا تهل علينا كل سنة وانتم طيبين
مين حابة تعمل حملة تنظيف للبيت قبل ما يدخل السقع و البرد
بس المرة دي حملة على الكراكييييييييييييب
الكراكيب اللي ممكن كل ما نيجي نتخلص منها الشيطان يحليها في عنينا وتبقى مركونة بقالها سنين ووقت ما نيجي نديها لحد ممكن نلاقي في دماغنا مليون فكرة واستخدام ليها
ربنا سبحانه وتعالى قال " الشيطان يعدكم الفقر "
ربنا سبحانه وتعالى غني واسع كريم رزاق معطي وهاب شكور
ليه الخوف!
يلا نحاول ننظف لو روبابيكية قديها لبتاع الروبابيكة او لبواب يسترزق بيها او جمعية خيرية تجيلك لحد البيت وتتصلى بيها
تعالو نفكر
في كام جاكيت في الدولاب مش محتاجينه
او كوفرتة او بلوفر
سجادة قديمة
ماوسات وكيبورد بايظة
اسلاك
العاب اطفال مكسرة
صندل او شنطة
لو حتى كوباية او برطمان او طقم كاسات
جرانين وورق
لو عندك جراج او اوضة خزين اخبارها ايه
يعني من الاخر اي حاجة قديمة للبيع زي ما بيقول بتاع الروبابيكيا :)
لو خلاص مش لازمكي قديها للي ممكن يستفيد بيها ولو حتى كانت استفادة بسيطة
لو حاجة تحت السرير او حاجة فوق الدولاب
يلا نعمل حملة و ننظف ونخلي بيوتنا تنتعش وتتنفس
طبعا مش بقولك كل حاجة قديها لو حاجة هتسترك في وقت ما خليها
ولو نويتي تعملي الحملة اوعي ترمي حاجة جوزك محتاجها او ممكن يسال عليها في الحالة دي انا مش مسؤولة حاجته اساليه عليها ما تتهوريش ارجوكي :)
يلا نفوق وننظف ونخلي بيوتنا احلى ولكن من الاعماق شوفي حاجتك و يلا ننشط وننشط بعضنا
النظافة حاجة جميلة يلا نحاول ونجرب واستعيني بالله و تذكري قول حبيبنا المصطفى " إن الله جميل يحب الجمال "

احساس الاقلية

اسوا احساس في الدنيا انك تحس انك اقلية
او تكون في وسط ناس بيحاولوا دايما يجنبوك
لا ما تستسلملوش
و ما تحسش بضعف
اهرب منه على طول
و ما تجريش ورا ناس يجنبوك
دور هتلاقي ناس بيحبوك
دور هتلاقي مجموعة
دور على اللي شبهك مش اللي متاح قدامك
دور جوا القلوب و حاول تفهم من العيون
مين اللي بيحبك مين اللي شبهك مين اللي ايجابي و بيشجع على الخير على طول
مين يحب و يتمنى يشوفك في احسن حال
مين يحب يشاركك احلام المستقبل ده اللي بيحبك بجد
قرب منه و ما تفوتهوش و حاول معاه تكونوا افضل و في احسن حال
لما تلاقي القلوب دي يبقى انت غالبا لاقيت الاصدقاء الحقيقيين
ربنا يرزقنا جميعا بالصحبة الصالحة

صلوا على حبيبنا المصطفى

اللهم صل و سلم و بارك على سيدنا محمد و على اله و صحبه و سلم

الجود من الموجود

الكرم خلق جميل من الاخلاق الحسنة التي يحث عليها ديننا الحنيف و كلنا بنحب الاشخاص الكرماء و نحبايضا ان نتخلق بالكرم

ومن اكتر اوقات يمكن الانسان بيكرم فيها لما بيكون عنده ضيف

تحبي ترحبي بيه و تحسسيه انك سعيدة بزيارته

لكن ساعات و لأي ظرف يتصل بيكي قريب لزيارتك و انت غير مستعدة

بالنسبة لي كان يربكني هذا الامر قليلا و اشعر بحيرة

و لكن بعد ما سمعت هذه المقولة اصبحت مرتاحة

و هي ان الجود من الموحود

اجتهدي في اكرام ضيفك بالمتاح عندك و ابتغي وجه الله في اكرامه
فعندما تقدمي ما لديك و ما هو متاح فانت لم تبخلي بشئ
 و لي قصة مع هذا المثل و هي أن
جاء اخي لزيارتي في مرة و تغدينا و بعد الغداء جهزت طبق فاكهة و كان لدي صنفين فاكهة بكمية وفيرة و هناك ايضا اخر حبتين كمثرى فاحترت هل اضع حبتا الكمثرى في الصحن ام انه عيب و ما يصحش اني اضع حبتين فقط !
فتذكرت المثل ووضعتهما و قلت لا تفكري كثيرا فالجود من الموجود و اذ بأخي لم يأكل سوى الكمثرى !! فسعدت كثيرا و قلت في نفسي فعلا وضعها جود و لو كانت قليلة
لا تستصغري شئ و اكرمي بما هو متاح عندك و ابتغي وجه الله
و تذكري دائما قول الحبيب الصطفى عليه افضل الصلاة و السلام
 " لا تحقرن من المعروف شيئا ولو أن تلقى أخاك بوجه طلق "

ايام العشر افضل ايام الدهر

كل عام و انتم بخير

اذكروا الله في هذه الايام المباركة
تقبل منا و منكم صالح الأعمال

تنظيف سطح الدولاب

السلام عليكم و رحمة الله
من الأماكن اللي مش بنقدر نوصلها و بتحتاج تنظيف أيضا من وقت للاخر هي اسطح الدولايب في الغرف
يمكن تنظيفها بالمكنسة الكهربائية او مسحها بقطعة قماش كبيرة مبللة و معصورة جيدا وتكرار المسح عدة مرات حتى يتظف جيدا
ويمكن بعد الانتهاء فرش اوراق الجرائد او ملاية شرشف قديم ينغسل من وقت للتاني
دمتم في حفظ الله ورعايته